ដរាបណាទីផ្សារការងារចង្អៀត អ្នកដែលស្ម័គ្រចិត្តចូលរៀនជំនាញសិល្បៈក៏នៅតែតិច

នរណាក៏ស្រលាញ់ គោរពឱ្យតម្លៃ និងទទួលស្គាល់ជំនាញសិល្បៈដែរ ប៉ុន្តែប្រសិនបើទីផ្សារការងារចង្អៀតសម្រាប់ពួកគេ វាលំបាកណាស់នៅក្នុងការលើកទឹកចិត្តឲ្យយុវវ័យសម័យ ក្រោយអោយទៅរៀនជំនាញសិ​ល្បៈ​។

ជំនាញសិល្បៈនៅពេលនេះមានច្រើនប្រភេទណាស់ រាប់តាំងពីរបាំប្រពៃណី ភ្លេងបុរាណ តន្រ្តីសម័យ ល្ខោ​នយីកេ ភាពយន្ត សូន្យរូប ...រហូតដល់បុរាណវត្ថុវិទ្យា ប៉ុន្តែមកដល់ពេលនេះ អ្នកដែលជំនាញនិងមានទីផ្សា​រនៅក្នុងវិស័យសិល្បៈគឺមានឱកាសតិចតួចស្តួចស្តើងមែនទែន។

សព្វថ្ងៃនេះអាជីពសិល្បករដែលគេឃើញមានភាពហ៊ឺហារឡូយឆាយ ទាន់សម័យ  និង​ជីវភាពធូរធារ ឃើ​ញ​តែក្រុមសិល្បៈដែលមានជំនាញសម្តែង និងអ្នកចម្រៀង ប៉ុន្តែទោះបីជាយ៉ាងណា ក្រុមអ្នកសិល្បករ និងសិល្បការិនី ដែលធូរធារនោះ គឺភាគរយក៏តិចដែរ ដូច្នេះហើយយុវវ័យភាគច្រើនមិនចាប់អារម្មណ៍ និងជំ​នា​ញនេះទេ។​

ម្នាក់ៗចង់អភិរក្ស ចង់រក្សា និងការពារតម្លៃនៃជំនាញសិល្បៈនានា ឲ្យគង់វង្ស ដូច្នេះគួរតែធ្វើកិច្ចការច្រើនថែ​មទៀត ប្រសិនបើពិតជាចង់ មិនមែនចង់តែមាត់ និងភាសា និយាយនោះទេ គឺត្រូវតែមានផែនការ និង ក​ម្មវិធី ពោលគឺធ្វើយ៉ាងណាធានាឲ្យអ្នកដែលរៀបចប់ជំនាញនេះ មានបាយហូប មានជីវភាពប្រដាំប្រសងនឹ​ងជំនាញឯទៀត ។​

ប្រសិនបើស្ថានការណ៍នៅតែដូចជាបច្ចុប្បន្ន មិនបាច់ចាំគាស់នោះទេ ទោះយកស្អីមកអូសទាញ ក៏មិនអាចសម្រេចទៅបានដែរ ពីព្រោះរៀនដើម្បីមានការងារធ្វើ មានប្រាក់ចំណូលចិញ្ចឹមខ្លួននិងគ្រួសារ ហើយបើរៀ​នចប់មិនដឹងធ្វើស្អី រកការងារធ្វើមិនបាន ចាំបាច់រៀនធ្វើអ្វី ។ នៅពេលនេះ អ្វីដែលអាចអូសទាញសកម្ម​ភាព និងការងារអភិរក្ស ក៏ដូចជាលើកកំពស់ជំនាញសិល្បៈនេះ គឺគ្មានអ្វីក្រៅពីបង្កើតស្ថានការណ៍ និងឱ​កាស ធ្វើយ៉ាងណា ដើម្បីឱ្យ​អ្នកដែលសម្រេចចិត្តចាប់យកជំនាញសិល្បៈនេះអាចរស់នៅបានសមរម្យ នោះ យុវវ័យ នឹងចាប់អារម្មណ៍ហើយ។​

នៅពេលនេះ​ដោយសារតែវិស័យឌីជីថលកំពុងតែផុលផុស យុវវ័យគឺចាប់អារម្មណ៍ខ្លាំងណាស់លើជំនាញដែលពាក់ព័ន្ធនឹងវិស័យនេះ ក្រៅពីនោះ ពួកគេក៏កំពុងតែចាប់អារម្មណ៍ នឹងជំនាញដែលពួកគេគិតថា ឡូ​យ​ និងកំពុងតែមានទីផ្សារការងារ គឺហិរញ្ញវត្ថុ និង​ធនាគារ វេជ្ជសាស្រ្ត ... ។

សរុបមកវិញចង់អភិរក្ស និងការពារក៏ដូចជាលើកកំពស់ជំនាញសិល្បៈគឺស្រួលទេ ពោលគឺបង្កើតគោលន​យោបាយ និងកម្មវិធីផ្សេងៗដើម្បីធ្វើយ៉ាងណាអោយជំនាញនេះ អាចមានលទ្ធភាពរកការងារធ្វើបានងាយស្រួ​ល គឺជួយអភិរក្សនិងការពារជំនាញនេះទៅហើយ៕