ឥស្សរជនខ្មែរដំបូង លោកហ៊ុន ម៉ាណែត បានចាក់វ៉ាក់សាំងកូវីដ១៩ រួចហើយ

លោក​ហ៊ុន ម៉ាណែត ជាកូន​ប្រុស​ច្បង​របស់​លោក​នាយករដ្ឋ​មន្រ្តីហ៊ុន សែន ជាពលរដ្ឋខ្មែរ​​ដំបូង​គេ​ដែល​បាន​ចាក់វ៉ាក់សាំង​កូវីដ១៩​ស៊ីណូហ្វាម របស់​សាធារណរដ្ឋ​ប្រជាមានិត​ចិន នៅ​ព្រឹក​ថ្ងៃ​ពុធ ទី១០ ខែកុម្ភៈ ឆ្នាំ​២០២១នេះ នៅ​មន្ទីរពេទ្យ​កាល់ម៉ែត្រ។

 

លោក​បាន​ថ្លែងប្រាប់អ្នកសារព័ត៌មាននៅ​ពេល​​ចាក់វ៉ាក់សាំងនេះថា លោក​មិន​មាន​អារម្មណ៍ភ័យ​ខ្លាច​នោះទេ តែលោក​សប្បាយ​ចិត្ត​ដែល​បាន​ចាក់វ៉ាក់សាំងការពារ​កូវីដនេះ ហើយ​លោក​ក៏​បានអំពាវនាវទៅដល់​​ប្រជាពលរដ្ឋខ្មែរផ្សេងទៀត គួរមក​ទទួល​ការ​ចាក់វ៉ាក់សាំងកូវីដ១៩នេះ។

 

លោក​បាន​មានប្រសាសន៍បន្ទាប់​ពី​ទទួល​បាន​វ៉ាក់សាំង​ម្ជុលទី១​រួច​ថា ៖ «ខ្ញុំបានចាក់វ៉ាក់សាំងការពារកូវីដ-១៩ រួចហើយ។ សូមបងប្អូនខ្មែររួមគ្នា និងត្រៀមលក្ខណៈចូលរួមជាមួយរដ្ឋាភិបាលអនុវត្តវិធានការសុខាភិបាល និងទទួលចាក់ថ្នាំបង្ការទៅតាមដំណាក់កាលនីមួយៗ តាមផែនការលទ្ធភាពរបស់រាជរដ្ឋាភិបាល ដើម្បីការពារខ្លួនយើង គ្រួសារយើង សង្គមជាតិយើង»។

 

លោកហ៊ុន ម៉ាណែត​បន្តទៀតថា ការប្រយុទ្ធប្រឆាំងនឹងជំងឺកូវីដ១៩ គឺផ្តើមចេញពីខ្លួនយើង ដើម្បីការពារខ្លួនយើងនិងអ្នកដទៃ។

 

ស្រ្តី​ខ្មែរដែល​ទទួល​នូវ​ការ​ចាក់វ៉ាក់​បន្ទាប់​ពី​លោកហ៊ុន ម៉ាណែត គឺ​លោក​ស្រី យក់ សម្បតិ្ត​ ជារដ្ឋលេខាធិ​ការ​ក្រសួងសុខាភិបាល។

 

លោក​ស្រី​បាន​ថ្លែង​ប្រាប់ដែរថា ៖ «ខ្ញុំមានអារម្មណ៍ធម្មតា ដោយសារខ្ញុំស្ម័គ្រចាក់វ៉ាក់សាំងនេះ ហើយខ្ញុំ​ត្រូវ​ធ្វើការ​ច្រើនជាមួយ​នឹង​កូវីដ និង​ខ្ញុំជាគ្រូពេទ្យ​នៅជួរ​មុខ​ផងដែរ ដែលខ្ញុំត្រូវ​តែទទួល​វ៉ាក់សាំង​នេះជាចាំបាច់»។

 

នៅព្រឹក​ថ្ងៃ​ដំបូងនៃការ​បើកយុទ្ធនាការចាក់វ៉ាក់សាំងកូវីដ១៩​ក្នុង​ប្រទេសកម្ពុជានេះដែរ សម្តេចនាយករដ្ឋមន្រ្តីហ៊ុន សែន បានលើកឡើងផងដែរថា ទីបំផុត ប្រទេសកម្ពុជាបានចាប់ផ្តើមដំណើរការជាផ្លូវការនូវការចាក់វ៉ាក់សាំងជូនប្រជាជនរបស់ខ្លួន ហើយ។

 

សម្តេច​តេជោមានប្រសាសន៍​តាមបណ្តាញសង្គម​ថា ៖ «នេះជាផ្លែផ្កានៃកិច្ចសហប្រតិបត្តិការរវាងកម្ពុជា ចិន ដែលជាមិត្តដែកថែបដែលខ្ញុំសុំយកឱកាសនេះថ្លែងអំណរគុណចំពោះបក្ស រដ្ឋ កងទ័ព និងប្រជាជនចិន ពិសេស ឯកឧត្តមប្រធានាធិបតី ស៊ី ជិនភីង ដែលបានផ្តល់ជំនួយដ៏សប្បុរសដល់ប្រជាជនកម្ពុជា»។

 

ប្រមុខរាជ​រដ្ឋាភិបាល សម្តេច​នាយករដ្ឋមន្រ្តីហ៊ុន សែនបាន​ធ្វើ​ការផ្តាំផ្ញើទៅប្រជាពលរដ្ឋកម្ពុជា​ទាំងអស់​ទាំងក្នុងនិងនៅក្រៅប្រទេសកុំបារម្ភលើវ៉ាក់សាំងមកពីប្រទេសណា? ម៉ាកអ្វី? តែគប្បីបារម្ភពីការអត់វ៉ាក់សាំងចាក់ ព្រោះគ្មានវ៉ាក់សាំងលក់តាមផ្សារដូចលក់ត្រី លក់ត្រកួននោះទេ។

 

បុត្រា​របស់​សម្តេចតេជោហ៊ុន សែនចំនួន​២រូប​ គឺលោកហ៊ុន ម៉ាណែត និងលោកហ៊ុន ម៉ានិត រួមនឹង​កូនប្រសារប្រុស​​ម្នាក់​គឺលោក សុខ ពុទ្ធិវុធ បានទទួល​ការចាក់វ៉ាក់សាំងកូវីដរួចហើយ ប៉ុន្តែ​សម្រាប់​លោក​ហ៊ុន ម៉ានី និងកូនប្រសារសម្តេចតេជោ​ម្នាក់ទៀតគឺ​លោក​ឌី វិជ្ជា មិនទាន់អាចទទួលការចាក់វ៉ាក់សាំងនេះបាន​ទេដោយសារ​គាត់ទាំងពីរមានបញ្ហាសុខភាព៕

Add new comment

13 + 0 =