អតីតថ្នាក់ដឹកនាំជាន់ខ្ពស់ហ៊្វុនស៊ិនប៉ិច​ដែលផ្តាច់ខ្លួន អំពាវនាវដល់សមាជិកនិងអ្នកគាំទ្រជិត ៤០ម៉ឺននាក់​ចូល​រួម​ជាមួយគណបក្សខ្មែររួបរួមជាតិ

នៅក្នុងលិខិតចំហ របស់អតីតថ្នាក់ដឹកនាំជាន់ខ្ពស់ នៃគណបក្សហ៊្វុនស៊ិនប៉ិចបានបញ្ជាក់ថា គណបក្សខ្មែ​ររួបរួមជាតិ "ខ.រ.ជ” ដែលបច្ចុប្បន្នដឹកនាំដោយឥស្សរជនជាន់ខ្ពស់ជាអតីតអ្នកតស៊ូ នៃចលនា​ហ៊្វុនស៊ិនប៉ិច តែងរិះរកមធ្យោបាយដើម្បីរួបរួមគ្នាក្នុងមហាគ្រួសារហ៊្វុនស៊ិនប៉ិច ស្របតាមព្រះបន្ទូល ដោយផ្ទាល់​នៃសម្តេចក្រុមព្រះ នរោត្តម រណឫទ្ធិ កាលពីព្រះអង្គទ្រង់នៅមានព្រះជន្ម ។ ប៉ុន្តែការ​បង្រួបបង្រួមរវាងគណបក្សទាំងពីរដែលមានប្រភពឫសគល់តែមួយនេះ ត្រូវបានបុគ្គលមួយក្រុមតូច ព្យាយាមរារាំងម្ដងហើយម្ដងទៀត ធ្វើឲ្យការវិលត្រឡប់មករួមរស់ក្នុងមហាគ្រួសាររាជានិយមមួយនេះ ត្រូវទទួលបរាជ័យ។ មជ្ឈដ្ឋានជាច្រើនបានសម្លឹងឃើញថា ភាពបែកបាក់ផ្ទៃក្នុង និងការធ្លាក់ចុះ​យ៉ាងគំហុក​នូវប្រជាប្រិយភាពនៃការគាំទ្រ និងការធ្លាក់ចុះនៃសក្តានុពលនយោបាយរបស់ហ៊្វុនស៊ិនប៉ិច គឺបណ្ដាលមកកត្តាអសមត្ថភាពក្នុងការគ្រប់គ្រង និងគ្មានបទពិសោធន៍ដឹកនាំគណបក្សនយោបាយ រួមទាំងការបណ្ដេញចាស់ទុំដែលជាសសរគ្រឹះដ៏រឹងមាំរបស់គណបក្ស ព្រមទាំងការផ្លាស់ប្តូរ​រចនាសម្ពន្ធ​ដោយរំលោភលើនីតិវិធីនៃលក្ខន្តិកៈគណបក្ស។

ប្រភពដដែលបានបន្តថា ជាការពិតណាស់កន្លងមកស្ថាបនិកហ៊្វុនស៊ិនប៉ិច អតីតថ្នាក់ដឹកនាំ​ជាន់ខ្ពស់​នៃគណបក្សហ៊្វុនស៊ិនប៉ិច បានខិតខំព្យាយាមសម្របសម្រួលដោះស្រាយបញ្ហាហ៊្វុនស៊ិនប៉ិច ឲ្យចប់​សព្វគ្រប់ទៅតាមនីតិវិធី និងលិខិត បទដ្ឋាននានាជាធរមាន ដើម្បីឈានទៅរកការផ្សះផ្សាមួយ ដោយលុបបំបាត់ការយល់ច្រឡំផ្សេងៗ ទៅលើលិខិតមិនប្រក្រតីនានា ដែលជាដើមហេតុ​នៃការបែក​បាក់​រចនាសម្ពន្ធ​ផ្ទៃក្នុងគណបក្ស។ ក្នុងនោះបញ្ហាការបង្រួបបង្រួមរវាងគណបក្សខ្មែររួបរួមជាតិ មកក្នុង​ក្របខណ្ឌ​នៃគ្រួសារគណបក្សហ៊្វុនស៊ិនប៉ិច ក៏ជាគោលការណ៍មួយផ្នែកនៃព្រះតម្រិះដ៏ខ្ពង់ខ្ពស់​របស់​សម្តេចក្រុមព្រះ នរោត្តម រណឫទ្ធិ កាលពីទ្រង់នៅមានព្រះជន្មផងដែរ ប៉ុន្តែពុំត្រូវបានបុគ្គល​មួយក្រុមតូច ក្នុងហ៊្វុនស៊ិនប៉ិច ផ្តល់តម្លៃជាវិជ្ជមាននោះទេ។

ដោយមើលឃើញថា នៅក្នុងកាលៈទេសៈនេះ​គឺជាពេលវេលាសំខាន់សម្រាប់​ការបោះឆ្នោត​ជ្រើសរើស ក្រុមប្រឹក្សាឃុំ/សង្កាត់ អាណត្តិទី៥ ឆ្នាំ២០២២ ចាស់ទុំស្ថាបនិកនៃហ៊្វុនស៊ិនប៉ិច និងអតីតថ្នាក់​ដឹកនាំជាន់ខ្ពស់ គណបក្សហ៊្វុនស៊ិនប៉ិច មានជម្រើសដ៏ល្អមួយ ដោយសូម​ធ្វើការអំពាវនាវ​ជាថ្មីម្ដងទៀតចំពោះអ្នករាជានិយម អ្នកសីហនុនិយម អ្នករណឫទ្ធិនិយម និងអ្នកប្រជាធិបតេយ្យ ជាពិសេស សហជីវិន សហជីវិនី ថ្នាក់ដឹកនាំនៅមូលដ្ឋាន សកម្មជន សមាជិក សមាជិកា ប្រជា​ពលរដ្ឋ​ម្ចាស់ឆ្នោតដែលជាកម្លាំងគាំទ្រដ៏សំខាន់ និងធ្លាប់គាំទ្រ​គណបក្សហ៊្វុនស៊ិនប៉ិច នៅក្នុង​បោះឆ្នោត​ឆ្នាំ២០១៨ សូមអញ្ជើញមកចូលរួមគាំទ្រគណបក្សខ្មែររួបរួមជាតិ “ខ.រ.ជ” តាមរយៈការចូលរួម រៀបចំបញ្ជីបេក្ខជនឈរឈ្មោះជាក្រុមប្រឹក្សាឃុំ សង្កាត់ នៅក្នុងរចនាសម្ពន្ធរបស់គណបក្សខ្មែរ​រួបរួម​ជាតិ​នៅទូទាំងប្រទេស រួមទាំងការកៀងគរសមាជិក សមាជិកា និងប្រជាពលរដ្ឋម្ចាស់ឆ្នោត ដើម្បី​ចូល​រួម​បោះឆ្នោតជ្រើសរើសក្រុមប្រឹក្សា ឃុំ សង្កាត់ ដែលនឹងប្រព្រឹត្តទៅនៅខែ មិថុនា ឆ្នាំ ២០២២ នា ពេល​ដ៏ខ្លីខាងមុខនេះ។

លិខិតដដែលបញ្ជាក់បន្ថែមថា ការចូលរួមជាមួយ គណបក្សខ្មែររួបរួមជាតិ គឺជាជម្រើសដ៏ល្អមួយ ក្នុងការលើកកម្ពស់ កិត្យានុភាព ប្រជាប្រិយភាព និងសក្តានុពលនយោបាយ នៃអ្នករាជានិយម អ្នកសីហនុនិយម រណឫទ្ធិនិយម ដែលបានចុះខ្សោយជាបន្តបន្ទាប់ ចាប់តាំងពីក្រោយ​ការបោះឆ្នោតនៅឆ្នាំ២០១៨។

ការចូលរួមជាមួយ គណបក្សខ្មែររួបរួមជាតិ គឺជាជម្រើសដ៏ល្អមួយ ក្នុងការសម្របសម្រួល ដោះស្រាយបញ្ចប់បញ្ហាបែកបាក់ផ្ទៃក្នុង នៃអ្នករាជានិយម អ្នកសីហនុនិយម រណឫទ្ធិនិយម ដែលបានអូស បន្លាយអស់រយៈពេលជាច្រើនឆ្នាំកន្លងទៅនេះ។ ការចូលរួមជាមួយ គណបក្សខ្មែរ​រួបរួមជាតិ "ខ.រ.ជ” គឺជាជម្រើសដ៏ល្អមួយ ស្របតាមព្រះបន្ទូលដ៏ ខ្ពង់ខ្ពស់នៃសម្តេចក្រុមព្រះ នរោត្តម រណឫទ្ធិ កាលពីព្រះអង្គទ្រង់នៅមានព្រះជន្ម “សម្លេងដែលមានកុំឲ្យបាត់ សម្លេងដែលបា​ត់ត្រូវប្រមូលមកវិញ”។ ការចូលរួមជាមួយ គណបក្សខ្មែររួបរួមជាតិ “ខ.រ.ជ គឺជាជម្រើសដ៏ល្អមួយ ក្នុងការពង្រីកចំនួន សមាជិកក្រុមប្រឹក្សាឃុំ សង្កាត់របស់គណបក្សខ្មែររួបរួមជាតិ ដើម្បីចូលរួមបំពេញ​សេចក្តីត្រូវការរបស់ប្រជាពលរដ្ឋម្ចាស់ឆ្នោតនៅថ្នាក់មូលដ្ឋាន។ ការចូលរួមជាមួយ គណបក្សខ្មែររួបរួមជាតិ គឺជាជម្រើសដ៏ល្អមួយ ក្នុងការទទួលជោគជ័យ ឈានឆ្ពោះទៅការបោះឆ្នោត​ជ្រើសតាំងតំណាងរាស្ត្រ នីតិកាលទី៧ នៃរដ្ឋសភា នៅឆ្នាំ២០២៣។

សូមជំរាបថា កាលពីថ្ងៃទី០២ ខែមីនា ឆ្នាំ២០២២ម្សិលមិញនេះ ក្រោយពីការប្រកាសជាផ្លូវការ ផ្តាច់ខ្លួន របស់អតីតមន្ត្រីជាន់ខ្ពស់របស់ហ្វ៊ុនស៊ិនប៉ិច ចូលជាមួយគណបក្សខ្មែររួបរួមជាតិ ខ.រ.ជ ។ លោកញឺកប៊ុនឆៃ ប្រធានគណបក្សខ្មែររួបរួមជាតិបាន ស្វាគមន៍យ៉ាង​កក់​ក្តៅ ដោយបញ្ជាក់​ថា​គណបក្សខ្មែររួបរួមជាតិ សូមស្វាគមន៍យ៉ាងកក់ក្តៅ និងទទួលដោយសេចក្ដីរីករាយ យ៉ាងក្រៃលែង ចំពោះការសម្រេចចិត្តរបស់អតីតថ្នាក់ដឹកនាំជាន់ខ្ពស់គណបក្សហ៊្វុនស៊ិនប៉ិច ដែលបានធ្វើការ សម្រេចចិត្តមករួបរួមជាមួយគណបក្សខ្មែររួបរួមជាតិដើម្បីពង្រឹងអ្នករាជានិយម សីហនុនិយម ឱ្យក្លាយទៅជា គណបក្សមួយដ៏រឹងមាំឡើងវិញ៕