ទីក្រុងវ៉ាស៊ីនតុន សម្ព័ន្ធមិត្ត និងក្រុមហ៊ុនមីក្រូសូហ្វថ៍ បរិហារអំពីការវាយប្រហារ​តាម​អ៊ីនធឺណិតក្នុងទ្រង់ទ្រាយធំដែលដឹកនាំដោយប្រទេសចិន

យោងតាមអាជ្ញាធរ​ទទួលបន្ទុក​សន្តិសុខអ៊ីនធឺណិត នៅសហរដ្ឋអាម៉េរិក កាណាដា ចក្រភព អង់គ្លេស អូស្រ្តាលី និងនូវែល ហ្សេឡង់ ព្រមទាំងក្រុមហ៊ុន មីក្រូសូហ្វថ៍ បរិហារ​ក្រុម Volt Typhoon ដែលដឹកនាំដោយទីក្រុងប៉េកាំង ជ្រៀតចូល​បណ្តាញ​ហេដ្ឋារចនាសម្ព័ន្ធ​អ៊ីនធឺណិត​សំខាន់​របស់សហរដ្ឋអាម៉េរិក មានជាអាទិ៍នៅលើកោះហ្គាម ដែលជាជម្រក​នៃ​មូលដ្ឋានយោធា​ដ៏​មានសារៈសំខាន់​របស់អាម៉េរិក នៅតំបន់ឥណ្ឌូប៉ាស៊ីហ្វីក។

កាលពីថ្ងៃទី២៥ ខែឧសភា សហរដ្ឋអាម៉េរិក និងសម្ព័ន្ធមិត្តបស្ចឹមប្រទេស បានចោទប្រកាន់​តួអង្គអ៊ីនធឺណិតដ៏សំខាន់របស់ប្រទេសចិន​ដែលបានជ្រៀតចូលយ៉ាងសំងាត់លើហេដ្ឋារចនា​សម្ព័ន្ធ​អ៊ីនធឺណិតសំខាន់ៗ របស់អាម៉េរិក និងព្រមានថា យុទ្ធនាការស្រដៀងគ្នា​អាចកើតមាន​ឡើង​​នៅទូទាំងពិភពលោក។

នៅក្នុងគំនិតរួម អាជ្ញាធរទទួលបន្ទុកសន្តិសុខអ៊ីនធឺណិតនៅអាម៉េរិក កាណាដា ចក្រភព​អង់គ្លេស អូស្ត្រាលី និងនូវែល ហ្សេឡង់ បានព្រមានថា ក្រុមដែលមានសកម្មភាពឈ្នានីស ដែលទាក់ទងទៅនឹងតួអង្គបណ្តាញអ៊ីធឺណិតត្រូវបានដឹកនាំដោយសាធារណរដ្ឋប្រជាមានិតចិន មានឈ្មោះថា Volt Typhoon។ ពួកគេបានបន្ថែមថា ៖ “សកម្មភាពនេះជះឥទ្ធិពល​លើ​បណ្តាញ​នៃវិស័យហេដ្ឋារចនាសម្ព័ន្ធសំខាន់ៗ នៅសហរដ្ឋអាម៉េរិក និងក្រុមដែលដឹកនាំការ​វាយ​ប្រហារ​​អាចនឹងប្រើបច្ចេកទេសដូចគ្នា​នៅក្នុងពិភពលោកទាំងមូល”។

នៅក្នុងសេចក្តីប្រកាសដាច់ដោយឡែកមួយ ក្រុមហ៊ុន អាម៉េរិក មីក្រូសូហ្វត៍ បានពន្យល់ថា​ ក្រុម Volt Typhoon គឺសកម្មតាំងពីពាក់កណ្តាលឆ្នាំ២០២១ និងពួកគេដាក់គោលដៅលើ​ហេដ្ឋារចនា​សម្ព័ន្ធសំខាន់​នៅលើកោះ ហ្គាម ដែលជាជម្រកនៃមូលដ្ឋានយោធាអាម៉េរិក ដ៏មាន​សារៈ​សំខាន់នៅក្នុងមហាសមុទ្រប៉ាស៊ីហ្វីក។ យុទ្ធនាការនេះ អាចផ្តល់ហានិភ័យនឹងធ្វើឲ្យ​ច្របូក​​ច្របល់​​​សម្រាប់​បណ្តាញទំនាក់ទំនងសំខាន់ៗ រវាង​សហរដ្ឋអាម៉េរិក និង​តំបន់អាស៊ី នៅ​អំឡុង​វិបត្តិនាពេលអនាគត។

ក្រុមហ៊ុនបច្ចេកវិជ្ជាអាម៉េរិក បានបន្តឲ្យដឹងថា យុទ្ធធាការវាយប្រហារសំដៅ​លើវិស័យ​ទំនាក់​ទំនង ឧស្សាហកម្ម សេវាសាធារណៈ ការដឹកជញ្ជូន សំណង់ កងទ័ពជើងទឹក រដ្ឋាភិបាល បច្ចេក​វិជ្ជាព័តមានវិជ្ជា និងការអប់រំ”។

យោងតាមក្រុមនេះ ឥរិយាបថដែលពិនិត្យឃើញ ផ្តល់យោបល់ថា មេគំរាមកំហែងមានគោល​បំណង​​ឈ្លបយកការណ៍ និងរក្សាការចូលទៅកាន់ហេដ្ឋារចនាសម្ព័ន្ធសំខាន់ៗ ដោយមិន​ត្រូវ​បានគេដឹងក្នុងរយៈពេលដ៏យូរតាមដែលអាចធ្វើទៅបាន។

បើយោងតាមទីភ្នាក់ងារសន្តិសុខបស្ចឹមប្រទេស ការវាយប្រហារនេះ ប្រើប្រាស់ជាអាទិ៍ តាកតិច​ដែលគេហៅថា Living off the land LotL តាមរយៈនេះ អ្នកឈ្លាន​ពាន​ប្រើប្រាស់​លក្ខណៈ​វិនិច្ឆ័យ និងឧបករណ៍នៃប្រព័ន្ធសត្រូវ​ដែលវាជ្រៀតចូល​ទៅខាងក្នុងដោយមិនបន្សល់​ទុក​នូវដានណាមួយឡើយ។

អ្នកវាយប្រហារអាចប្រើប្រាស់ឧបករណ៍រដ្ឋបាលស្របច្បាប់ដើម្បីចូលទៅក្នុងប្រព័ន្ធសត្រូវ​ដើម្បីស៊កបញ្ចូលស្រ្គីប ឬកូដដែលមានមេរោគ។

នាយិកានៃទីភ្នាក់ងារអាម៉េរិកនៃសន្តិសុខអ៊ីនធឺណិត និងសន្តិសុខហេដ្ឋារចនាសម្ព័ន លោកស្រី ជេន អៀស្ទើលី ក៏បានបញ្ចេញការព្រមានប្រឆាំងនឹងក្រុម Volt Typhoon។ លោកស្រី ជេន អៀស្ទើលី បានប្រកាសថា ៖ “ចាប់តាំងពីច្រើនឆ្នាំមកហើយ ប្រទេសចិនបាន​ដឹកនាំ​ប្រតិបត្តិការនៅក្នុងពិភពលោកទាំងមូល​ដើម្បីលួចកម្មសិទ្ធបញ្ញា និងទិន្នន័យរសើបនៃ​ការ​រៀបចំ​ហេដ្ឋារចនាសម្ព័ន្ធក្រៅប្រទេស។