ឥណ្ឌូនេស៊ី ប្រយុទ្ធដើម្បីទឹកដីពួកគេប្រឈមមុខនឹងការជីកយករ៉ែនីកែល

Tuesday, March 21, 2023

ការផ្ទុះឡើងនូវតម្រូវការនីកែលគំរាមកំហែងបរិស្ថាន និងសិទ្ធរបស់កសិករនៅលើផ្ទៃដីឥណ្ឌូនេស៊ី។ ឧស្សាហកម្មនីកែលនេះកំពុងកើតឡើងជាមួយនឹងតំរូវការដែលកើនឡើងសម្រាប់លោហៈធាតុចាំបាច់ដើម្បីផលិតថ្ម លីស្យូម អាយអន។ ក្រុមហ៊ុនចិន កូរ៉េខាងត្បូង អាម៉េរិកតេស្លា ឬក្រុមហ៊ុនរ៉ែប្រេស៊ីល កំពុងសម្រុកមកធ្វើការនៅទីនោះ។

ទីតាំងដែលដីប្រែក្លាយជាឡើងពណ៌ក្រហមដែលត្រូវបានខួងដោយម៉ាស៊ីន បង្ហាញពីការស្រេកឃ្លានរបស់ក្រុមហ៊ុននៅក្នុងស្រុក និងបរទេសសម្រាប់រ៉ែនីកែលនៅក្នុងប្រទេសឥណ្ឌូនេស៊ី។ ក្រុមហ៊ុនទាំងនេះស្ថិតនៅក្នុងប្រទេសដែលជាអ្នកផលិតដ៏ធំបំផុតនៅលើពិភពលោកសម្រាប់លោហៈធាតុគន្លឹះដើម្បីធ្វើអាគុយ និងសម្រាប់យានយន្តអគ្គីសនី។ ការហក់ឡើងខ្ពស់នៃតម្រូវការនីកែល គំរាមកំហែងបរិស្ថាន និងសិទ្ធរបស់កសិករនៅលើផ្ទៃដីរបស់ពួកគេ ដូចជានៅតំបន់ វ៉ាវ៉ូនីអ៊ី ដែលស្ថិតនៅជិតកោះ Célèbes ដែលសម្បូរទៅដោយ ធនធានធម្មជាតិនីកែលនេះ។ ហើយតំបន់នេះ ក៏ជាជម្រកនៃពូជសត្វកម្រជាច្រើនប្រភេទផងដែរ។

រ៉ូយ៉ានី ដែលមានឈ្មោះតែមួយ ដូចប្រជាជនឥណ្ឌូនេស៊ីភាគច្រើនដែរ បានឈរជុំគ្នាជាមួយអ្នកភូមិផ្សេងទៀត បន្ទាប់ពីដើមឈើជាច្រើនរយដើមដែលគ្រួសាររបស់អ្នកស្រីដាំលំអ ត្រូវបានកាប់រំលំកាលពីខែមករា។ រ៉ូយ៉ានីនិយាយថា ៖ “នៅពេលដែលយើងបានឃើញថា វាគ្មាននៅសល់អ្វីទាំងអស់ មានន័យថា យើងត្រូវបានគេបំផ្លាញ”។ រ៉ូយ៉ានី ចង់ការពារដីគ្រួសារ គាត់ ក៏ដូចជាដីរបស់អ្នកជិតខាង។ ប៉ុន្តែអ្នកភូមិប្រឈមមុខនឹងគូប្រជែងដ៏មានអំណាច។

តម្រូវការកើនឡើងនូវលោហៈសំខាន់សម្រាប់អាគុយលីស្យូម អាយអន និងលោហៈដែលមិនរងអុកស៊ីតកម្ម បានធ្វើឲ្យឥណ្ឌូនេស៊ីអាចទាក់ទាញក្រុមហ៊ុនចិន កូរ៉េខាងត្បូង ក្រុមហ៊ុនយានយន្តយក្សរបស់អាម៉េរិក Tesla ព្រមទាំងក្រុមហ៊ុនរ៉ែរបស់ប្រេស៊ីល វ៉ាល់ ផងដែរ។ រោងចក្រចម្រាំងនីកែល ជាង ១០ ត្រូវបានកសាងឡើងកាលពីពេលថ្មីៗ នៅលើកោះ Célèbes ហើយក៏មានគម្រោងការដទៃជាច្រើនទៀត ត្រូវបានប្រកាសឡើងផងដែរ។

ក្រុមហ៊ុនឥណ្ឌូនេស៊ី Gema Kreasi Perdana (GKP) ដែលត្រូវគ្រប់គ្រងដោយគ្រួសារមួយដែលមានបំផុតនៅឥណ្ឌូនេស៊ី ត្រូវបានផ្តល់ដីសម្បទានពីរកន្លែង នៅតំបន់ វ៉ាវ៉ូនីអ៊ី ដែលមានទំហំសរុប ១៨០០ ហិចតា។

អ្នករស់នៅកោះនិយាយថា ក្រុមហ៊ុនចង់ពង្រីកវិសាលភាព ហើយបុគ្គលិករបស់ពួកគេព្យាយាមមិនឈប់មិនឈដើម្បីបញ្ចុះបញ្ចូលអ្នកភូមិ ឲ្យធ្វើសម្បទានដីរបស់ពួកគេ។

ដោយត្រូវបានសាកសួរ ទាំង GKP ទាំងក្រសួងថាមពល និងធនធានរ៉ែឥណ្ឌូនេស៊ី ទាំងទីភ្នាក់ងារតំបន់នៃថាមពល មិនមាននរណាធ្វើការអធិប្បាយទេ។

លោកហាស្តាទី អាយុ ៤២ឆ្នាំ ដែលជាកសិករដាំស្វាយចន្ទី ហើយដីរបស់លោក មួយផ្នែកត្រូវបានឈូសឆាយ អះអាងថា ៖ “ទោះបីជាគេឲ្យគាត់ ១ពាន់លានរូពី ឬប្រមាណ ៦០០០០ ម៉ឺនដុល្លារ ក៏គាត់មិនលក់ដែរ”។

បាតុករជាច្រើន នៅវ៉ាវ៉ូនីអ៊ី ត្រូវបានកោះហៅបន្ទាប់ពីការធ្វើបាតុកម្ម ការវាយប្រហារ ហើយនឹងមានការប្រឈមមុខដោយអាវុធដែលបង្កឡើងដោយជម្លោះដណ្តើមដី។ លោកហាស្តូម៉ា កសិករដាំដូង អាយុ ៣៧ឆ្នាំ និយាយថា លោកត្រូវបានគេចាប់ឃុំ ៤៥ថ្ងៃ ដោយអាជ្ញាធរបន្ទាប់ពីការប៉ះទង្គិច។