ស៊ីម៉ា អ៊ី មហាឧបរាជនគរវ៉ៃសម័យសាមកុក

ស៊ីម៉ា អ៊ី កើតនៅថ្ងៃទី៧ ខែកញ្ញា ឆ្នាំ២៥១។ លោកគឺជាអ្នកយុទ្ធសាស្រ្តចិននៃយុគសម័យនៃ​ចុងបញ្ចប់រាជ្យវង្ស ហាន និងសម័យសាមកុក។ មុនដំបូង​លោកបម្រើការជាឧបរាជ​ឲ្យឆាវឆាវ បន្ទាប់មកឲ្យក្សត្រនៃរាជវង្សនគរវ៉ៃ។ ចៅរបស់លោក គឺស៊ីម៉ា យាន បានឡើងកាន់អំណាច និង បង្កើតរាជវង្ស ជីន។

ស៊ីម៉ា អ៊ី មានឈ្មោះមួយទៀតថា ចុងតា។ ស៊ីម៉ា អ៊ី គឺស្ថិតនៅក្នុងគ្រួសារមួយ​ដែលមានបងប្អូន ប្រុសស្រី ៨នាក់។ គ្រួសាររបស់លោក​រស់នៅទីក្រុងលួយ៉ាង នៅពេលដែលតុង ជួ កំពុង គ្រប់គ្រងទីក្រុង ហើយតុងជួរ កំទេចទីក្រុងនេះ និងផ្លាស់រាជធានី​ទៅកាន់ ឆានអាន។ ស៊ីម៉ា ឡាង បងប្រុសច្បងរបស់ស៊ីម៉ា អ៊ី បានដឹកនាំគ្រួសារទាំងមូលទៅនៅលើដី​របស់បុព្វ​បុរស របស់ពួកគេ នៅស្រុក វេន។ នៅពេលទៅដល់កន្លែង ស៊ីម៉ា អ៊ីពិនិត្យមើលស្ថានភាពតំបន់ និង ព្យាករថា ទីកន្លែងនោះ​នឹងក្លាយ​ជាសមរភូមិប្រយុទ្ធ។ លោកក៏បានផ្លាស់គ្រួសារទៅកាន់ទីក្រុង លីយ៉ាង មុនបន្តិចមុនការទស្សទាយរបស់លោកក្លាយជាការពិត។ នៅឆ្នាំ១៩៤ នៅពេល ឆាវឆាវ យកជ័យជម្នះ​លើលីពូ បាន ស៊ីម៉ា អ៊ី បានដឹកនាំគ្រួសាររបស់លោក ត្រឡប់មកស្រុក វេនវិញ។

បន្ទាប់ពីបម្រើការងារ ជាមន្រ្តីធំ ឲ្យត្រកូលឆាវ អស់រយៈពេលជាច្រើនឆ្នាំ នៅឆ្នាំ២៤៧ លោក​ស៊ី ម៉ាអ៊ី ដឹងអំពី​ភាពគ្មានអំណាចរបស់លោក លោកបានក្លែងខ្លួនឈឺធ្ងន់ និងបានដកខ្លួន​ពី​ជីវិត​សាធារណៈ។ ដោយការសង្ស័យ ឆាវស្ហ័ង ដែលជាមេបញ្ជាការយោធា​ជាន់ខ្ពស់ត្រកូល​ឆាវ បញ្ជូនលី ស្ហេង ទៅសួរសុខទុក្ខស៊ីម៉ា អ៊ី ដើម្បីចង់ដឹងសភាពថា ឈឺពិតមែន ឬយ៉ាងណា? ស៊ីម៉ា អ៊ី​ មិនឈឺទេ តែក៏ដឹង ​ហើយប្រើឱកាសនៃការសួរសុខទុក្ខនេះ និងបញ្ឆោត លី ស្ហេង ថា ខ្លួន​គាត់ពិតជាឈឺពិតមែនដោយជំងឺមនុស្សចាស់ ហើយជិតស្លាប់។

នៅឆ្នាំ២៤៩ ស៊ីម៉ា អ៊ី សម្រេចចិត្តបញ្ជេញសកម្មភាព។ នៅខណៈដែល ឆាវ ហ្វាង ព្រះ​រាជា​អាយុ ៨ឆ្នាំ ត្រកូលឆាវ និងឆាវ ស្ហ័ង បានទៅមើលផ្នូរអតីតព្រះរាជាមុន ឆាវ រួយ ស៊ីម៉ា អ៊ី បាន​បញ្ជា​​ឲ្យបិទ​ទ្វារទាំងអស់នៃក្រុងលួ យ៉ាង ដោយក្លែងថា បានទទួលបញ្ជាឲ្យធ្វើដូច្នេះ ពី​ម្ចាស់​ក្សត្រី ដោយមានការគាំទ្រពីមន្ត្រីមួយចំនួន​ដែលប្រឆាំងនឹងឆាវ ស្ហ័ង។ បន្ទាប់មក ស៊ីម៉ា អ៊ី បាន​ថ្វាយរបាយការណ៍ទៅកាន់ព្រះរាជា ឆាវ ហ្វាង ដែលលោកចោទ ឆាវ ស្ហ័ងថា ចង់​ដណ្តើមអំ​ណាច និងធ្វើឲ្យរដ្ឋាភិបាលពុករលួយ និងសុំឲ្យដកតំណែង ឆាវ ស្ហ័ង និង​សាច់​ញាតិ។ នៅពេលឮដូច្នេះ ឆាវ ស្ហ័ង ច្របូកច្របល់ និងមិនដឹងប្រតិកម្មយ៉ាងម៉េច?  ហ័ន ហ្វាង ទីប្រឹក្សាសំខាន់ បានផ្តល់យោបល់ឲ្យ​នាំឆាវ ហ្វាង ទៅជាមួយ និងនាំទៅស៊ូឆាង ដែល​ជា​រាជធានី​ទី២ របស់នគរវ៉ៃ និងបោះមូលដ្ឋានកងកម្លាំង​ដើម្បីតស៊ូជាមួយស៊ីម៉ា អ៊ី។ ប៉ុន្តែឆាវ ស្ហ័ង បោះបង់ទាហានខ្លួន និងអំណាច បន្ទាប់ពីស៊ីម៉ា អ៊ី បានសន្យាជាមួយគាត់ថា គាត់​អាច​​បន្ត​​មានជីវិតសម្បូរសប្បាយសោយសុខ។ ប៉ុន្តែ ស៊ីម៉ា អ៊ីបានក្បត់សន្យាគាត់ភ្លាមៗ និង​ប្រហារ​ជីវិត ឆាវ ស្ហ័ង និងបរិវារ ព្រមទាំងអ្នកក្រោមបង្គាប់ ដោយចោទប្រកាន់ថា​ ក្បត់នគរ។

យោងតាមទ្រឹស្តីមួយ ដែលមិនទាន់ឯកភាពទាំងស្រុង គឺថា មនុស្សមួយចំនួនគិត​ថាស៊ីម៉ា អ៊ី មានគោលបំណងកម្ចាត់ត្រកូលឆាវ ចាប់តាំងពី​គាត់ចូលបម្រើឆាវឆាវដំបូងម្ល៉េះ។ ឆាវឆាវ ធ្លាប់​បាន​ប្រាប់កូន ឆាវ ពីថា ស៊ីម៉ា អ៊ី មានមហិច្ចតាលាក់កំបាំង ហើយគាត់មិនសប្បាយចិត្ត​នឹង​បម្រើ​អ្ន​កដទៃទេពេញមួយជីវិតរបស់គាត់។

ស៊ីម៉ា អ៊ី បានស្លាប់ដោយជំងឺជរា នៅឆ្នាំ២៥១ ក្រោយបន្តិចបន្ទាប់ពីការបះបោរប្រឆាំងត្រកូល​ឆាវ ហើយបានធានាឲ្យមានការក្តោបក្តាប់អំណាចរបស់ត្រកូលស៊ីម៉ា នៅលើនគរ វ៉ៃ។ កូនប្រុស របស់គាត់ ស៊ីម៉ា ស៊ឺ ជាអ្នកស្នងតំណែងរបស់គាត់។