អាជ្ញាធរគួរតែពិនិត្យនិងពង្រឹងវិធានការអំពីចោរកម្ម

រឿង​ចោរ​ប្លន់​សម្លាប់​ហាក់​ដូច​ជា​ថយ​ចុះ ប៉ុន្តែ​មិន​មែន​គ្មាន​នោះ​ទេ ប៉ុន្តែ​រឿង​ចោរ​ឆក់ ចោរ​លួច​ ចោរ​គាស់​ផ្ទះ ចោរ​គៀប​ស៊ី និង​ចោរ​លូក​ហោប៉ៅ គឺ​នៅ​សំបូរ​ហើយ​សកម្ម​ថែម​ទៀត រី​ឯ​សមត្ថកិច្ច​វិញ​ហាក់​មិន​សូវ​ដុត​ដៃ​ដុត​ជើង​យក​ចិត្ត​ទុក​ដាក់​លើ​រឿង​នេះសោះ។

រឿង​ចោរកម្ម​បែប​នេះ វា​បន្ត​កើតមាន​នៅ​តាម​ទី​កន្លែង​សាធារណៈ​នានា ដូចជា​នៅ​តាម​ដង​ផ្លូវ តាម​ផ្សារ ​តាម​ទីលំ​នៅ​ដ្ឋាន ជាពិសេស​គឺ​នៅ​រាជធានី​ភ្នំពេញ​និង​ទីប្រជុំ​ជន​មួយ​ចំនួន ពោល​គឺ​សំបូរ​នៅ​កន្លែង​ដែល​ជា​មជ្ឈមណ្ឌល​សេដ្ឋកិច្ច ទេសចរណ៍ និង​វប្បធម៌​របស់​ជាតិ​តែ​ម្តង ដូច្នេះ​សមត្ថកិច្ច និង​អាជ្ញាធរ​គួរ​តែ​យក​ចិត្ត​ទុក​ដាក់​ចាត់​វិធាន​ការណ៍​ឲ្យ​បាន​ម៉ឺងម៉ាត់​លើ​បញ្ហា​អសកម្ម​នៅ​ក្នុង​សង្គម​កម្ពុជា​មួយ​នេះ​ឲ្យ​ខាន​តែ​បាន។

តាម​ការ​សង្កេត​របស់​យើង​ខ្ញុំ បញ្ហា​អសកម្ម​នៅ​ក្នុង​សង្គម​កម្ពុជា​មួយ​នេះ វា​មិន​មែន​កើត​មាន​តែ​មក​លើ​ពលរដ្ឋ​កម្ពុជា​តែ​ប៉ុណ្ណោះ​ទេ គឺ​វា​កើត​មាន​ទៅលើ​អ្នក​ទេសច​រ អ្នក​វិនិយោគ​ទុន ពាណិជ្ជ​ករ ដែល​ជា​ជន​​បរទេស ជា​ហេតុ​បណ្តាល​ឲ្យ​ពួក​គេ​ជួប​រឿង​ដែល​ជូរ​ចត់​មែន​ទែន​ ខណៈ​ពេល​ដែល​បាន​មក​ដល់​​ទឹក​ដី​នៃ​ព្រះរាជាណា​ចក្រ​កម្ពុជា​យើង។ កន្លង​មក មាន​អ្នក​ខ្លះ​ចាប់​ផ្តើម​ជួប​រឿង​ស៊យ​របស់​ពួក​គេនៅ​តាម​ ផ្លូវ​ចេញពី​ព្រលាន​យន្តហោះ​ក៏​មាន ដែល​ទាំង​នេះ​សមត្ថកិច្ច​និង​កងកម្លាំង​សន្តិសុខ​ទាំងអស់​គួរ​តែ​យក​ចិត្ត ទុក​ដាក់​ឲ្យ​បាន​មែន​ទែន។

 

រឿង​ដែល​សោក​សង្រេង​ទៅ​ទៀត​នៅ​ពេល​ដែល​ប្រជាពលរដ្ឋ និង​ភ្ញៀវ​ទេសចរ​ទៅ​រក​សមត្ថកិច្ច​ប្តឹង គឺ​ហាក់​ដូចជា​រុញ​ឲ្យ​គ្នា​ពី​មួយ​ទៅ​មួយ។ ឧទាហរណ៍​រឿង​ចោរ​ឆក់​នៅ​លើ​ផ្លូវ​មួយ ពេល​ទៅ​ជួប​សមត្ថកិច្ច នៅ​ប៉ុស្តិ៍នេះ ថា​មិន​មែន​ជាដែន​សមត្ថកិច្ច​របស់​ខ្លួន សូម​ទៅ​ប៉ុស្តិ៍​នោះ​វិញ ហើយ​នៅ​ពេល​ទៅ​ដល់​ប៉ុស្តិ៍​នោះ ពេល​ខ្លះ​ពិបាក​រក​មន្រ្តី​ប៉ូលីស​ដែល​ទទួល​ខុស​ត្រូវ​ថែម​ទៀត។ ម្យ៉ាង​វិញ​ទៀត សូម្បី​ទៅ​ដល់​ហើយ​នោះ ក៏​ត្រូវ​រក​អ្នក​សរសេរ​ពាក្យ​បណ្តឹង​ឲ្យ ហើយ​ទម្រាំ​រក​អ្នក​សរសេរ​ពាក្យ​បណ្តឹង​នោះ​បាន គឺ​ត្រូវ​បាន​មេ​ប៉ុស្តិ៍​ស៊ី​ញ៉េថែ​មទៀត ហើយ​អ្នក​ដែល​សរសេរ​នោះ​ភាគ​ច្រើន​ទារ​ថ្លៃ​ទឹក​ប៊ិច​បន្ថែម។ ដូច្នេះ​ទម្រង់​ការ​នេះ គឺ​យឺត​យ៉ាវ​មែន​ទែន ហើយ​មិន​បង្ហាញ​អំពី​សេវា​ដ៏​កក់​ក្តៅ​ជូន​ប្រជា​ពលរដ្ឋ និង​ជូន​ភ្ញៀវ​ទេសចរ​អន្តរជាតិ​ឲ្យ​កក់​ក្តៅ​បន្តិច​ណា​ឡើយ ខណៈ​ដែល​ពួក​គេ​បាត់​បង់​សម្ភារ​មាន​តម្លៃ លិខិត​ឆ្លង​ដែន លុយ​កាក់ និង​របួស​ថែម​ទៀត​ផង​ក៏​មាន។

 

ទាំងនេះ​គឺ​ជា​ទិដ្ឋភាព​ដ៏​អវិជ្ជមាន​ដែល​សមត្ថកិច្ច​និង​អាជ្ញាធរ​មូល​ដ្ឋាន​នានា គួរ​តែ​កែ​សម្រួល​និង​មាន​វិធាន​ការ​ពង្រឹង​សមត្ថកិច្ច​នៅក្នុង​ការឆ្លើយ​តប​បញ្ហា​នេះ​ឲ្យ​ខាង​តែ​បាន​ហើយ។

 

មក​ដល់​ពេល​នេះ នៅ​ស្រុក​គេ ជាពិសេស​គឺ​នៅ​ស្រុក​ជិត​ខាង​យើង គេ​ក៏​មាន​បញ្ហា​នេះ​ដែរ ប៉ុន្តែ​ជា​ទូទៅ​ប្រតិកម្ម និង​សេវាកម្ម​ឆ្លើយ​តប​របស់​គេ​ហាក់​មាន​ភាព​កក់​ក្តៅ និង​ប្រសើរ​ជាង ព្រម​ទាំង​មាន​ប្រសិទ្ធភាព​ខ្លាំង។ ហើយ​កន្លែង​ដែល​គ្មាន​សុវត្ថិភាព មិន​មែន​មាន​ជាទូទៅ​គ្រប់​តែ​កន្លែង​ដូច​ជា​នៅ​ស្រុក​យើង​នោះ​ទេ គឺ​គេ​មាន​តែ​កន្លែង​ណា​ដែល​មាន​មនុស្ស​ច្រើន​កុះករ មនុស្ស​ច្រើន​ពិបាក​គ្រប់​គ្រង​តែ​ប៉ុណ្ណោះ ប៉ុន្តែ​ស្រុក​យើង​មិន​ថា​កន្លែង​ស្ងាត់ អ៊ូអរ​នោះ​ទេ គឺ​វា​កើត​ឡើង​សឹង​តែ​គ្រប់​កន្លែង។

 

ដូច្នេះ​យើង​ខ្ញុំ​សង្ឃឹម​ថា សមត្ថ​កិច្ច និង​កង​កម្លាំង​សន្តិសុខ ដែល​តែង​តែ​អះអាង​អំពី​ភាព​ប្រសើរ​ឡើង​នៃ​ស្ថានភាព​សន្តិសុខ សណ្តាប់​ធ្នាប់​សង្គម​នៅ​ក្នុង​ប្រទេស​យើង គួរ​តែ​ចាត់​វិធាន​ការ​លុប​បំបាត់​ភាព​អសកម្ម នេះ​ឲ្យ​បាន​ហើយ ពីព្រោះ​បទល្មើស​តូច​តាច​ទាំង​នេះ ក៏​ជា​បច្ច័យ​មួយ​ដែល​អាច​យក​ទៅ​ឃោសនា វាយ​ប្រហារ​ប្រទេស​យើង​បាន​យ៉ាង​ងាយ និង​លឿន​ថែម​ទៀត​ផង ដូច្នេះ​សូម​ចាត់​វិធានការណ៍​ជា​បន្ទាន់ ដើម្បី​ឲ្យ​ស្រុក​យើង​ក្លាយ​ជា​គោល​ដៅ​ទេសចរណ៍ កន្លែង​ធ្វើ​អាជីវកម្ម​ដ៏​មាន​សុវត្ថិភាព​ដ៏​បរិបូរណ៍៕

Add new comment

18 + 1 =

Please wait while the page is loading