ស្វាមីភរិយាត្រូវធ្វើអ្វីខ្លះ ដើម្បីថែរក្សាចំណងប្រាំប្រការរបស់ខ្លួន?

ចំណងប្រាំប្រការ គឺជាទ្រឹស្តីតាមបែបព្រះពុទ្ធសាសនា  ចំណងដែលជាអាវុធ តាមចងរឹតមនុស្ស សត្វ អោយស្លាប់ចិត្ត គំនិត និង ស្មារតី ដដែលជាដដែល មាន ៥ គឺ រូប សម្លេង ក្លិន រស និង ផោដ្ឋពៈ។ បើនិយាយពីចំណងប្រាំប្រការរបស់ស្វាមីភរិយា គឺការថែក្សានូវសុភមង្គល កូន ឪពុកម្តាយទាំងសងខាង សាច់ញាតិ និងចៅៗ។ ចំណងមួយនេះគឺជាចំណែកមួយក្នុងជីវិតសា្វមីនិងភរិយា ដែលត្រូវយល់ដឹង នៅក្នុងជីវិតក្រោយអាពាហ៍ពិពាហ៍ ឬហៅបានថាជាជីវិតគូរ។

តែមានទស្សនៈខ្លះទៀត យល់ថា ចំណងប្រាំប្រការនោះ គឺជាខ្សែ ជាច្រវាក់ សម្រាប់ចងក សម្រាប់ចងដៃ ជាដើម។ មានខ្លះទៀត បកស្រាយ ចំណងប្រាំប្រការ ក្នុងគោលបំណង បង្ហាញស្ត្រីទាំងឡាយ នូវវិធីចងចិត្តស្វាមីអោយជាប់ មិនអោយស្វាមី គេចកែទៅមានថ្មី ដោយប្រើប្រាស់វិធីផ្សេងៗ ដូចជាប្រឹងតុបតែងលម្អខ្លួន ត្រូវមានកូនបន្តពូជប្ដី អោយចេះចាញ់ប្ដី មិនឈ្លោះប្រកែក អោយចេះរក្សាទ្រព្យ ជាដើម។

ព្រះភិក្ខុ ទេន វន្នី គង់នៅវត្តសំពោងផលអណ្តែត មានសង្ឃដិការថា «ស្វាមីត្រូវលើកតម្កើង អោយភរិយាមានមុខមាត់ខ្ពស់ សមជាភរិយាដ៏ឧត្តម។ ស្វាមីមិនបង្អាប់ភរិយា អោយទៅជាទាសករ មិនប្រើហឹង្សាទៅលើភរិយា។ ស្វាមី មិនក្បត់ចិត្តភរិយា។ ស្វាមីត្រូវប្រគល់ សិទ្ធអោយភរិយាជាមេផ្ទះ គ្រប់គ្រងផ្ទះ ទ្រព្យសម្បត្តិ កូនចៅអោយបានត្រឹមត្រូវ និងស្វាមីទាំងអស់ត្រូវរកគ្រឿងតុបតែងអោយភរិយាតាមលទ្ធភាពដែលខ្លួនមាន»។

លោក ជា ពិសី​ ជាជាងទងម្នាក់ក្នុងរាជធានីភ្នំពេញ បានប្រាប់អោយដឹងថា ចំពោះលោកជាស្វាមីដើម្បីថែ   រក្សា នូវចំណងប្រាំប្រការរបស់ខ្លួនជាមួយប្រពន្ធ គឺលោកមិនប្រើអំពើហឹង្សាទៅលើភរិយា​និង បង្កើននូវភាពផ្អែមល្ហែម ដើម្បីអោយចំណងអាពាហ៍ពិពាហ៍របស់ខ្លួន បន្តទៅ មុខជានិច្ច។

លោក ជា ពិសី បានបន្តថា «ប្តីត្រូវស្រឡាញ់ប្រពន្ធដូចដើម មិនមែនស្រឡាញ់តែដំបូងនោះទេ ត្រូវផ្អែមល្ហែមដូចជាពេលនៅជាសង្សានឹងគ្នាផងដែរ»។ ជាងមាស រូបនេះ បានបន្ថែមថា បុរសជាស្វាមីគ្រប់រូប មិនត្រូវលោបលន់នឹងទ្រព្យសម្បត្តិនោះទេ ពេលកសាង​គ្រួសារ ត្រូវគិតថា​ប្ដីប្រពន្ធ​មានសិទ្ធិ​ដូចគ្នា​ចាត់ទុក​គ្នាដូចជា​មិត្ដដ៏​ ស្មោះត្រង់ មិនត្រូវគិតថា​ប្ដីជាអ្វីៗ​ទាំងអស់ទេ ហើយមើល​ស្រាលប្រពន្ធ​ខ្លួនឯង ចាត់ទុក​ជាអ្នក​បំរើ ឬអ្នកនៅ​ក្រោមបញ្ជា​របស់ខ្លួន នោះគឺជា​ប្រការខុសឆ្គងដ៏មាន​គ្រោះថ្នាក់​បំផុត។ វាជាការ​ពិតដែល​បុរសជា​អ្នកធ្វើការ​រកលុយ​ជួយគ្រួសារ។

ចំណែក អ្នកនាង ស៊ិន កញ្ចនា ជាបុគ្គលិកផ្នែកលក់នៅបុរីភ្នំពេញ បានប្រាប់ថា ដើម្បីថែរក្សានូវចំណងប្រាំប្រការរបស់ខ្លួន បុរសជាប្ដី​កុំធ្ងន់ស្រាល​មនោសញ្ចេតនា​ម្ខាងៗ មានន័យថា​កុំធ្ងន់មក​លើគ្រួសារ​ខ្លួនឯងពេក ហើយមើល​ស្រាលខាង​ប្រពន្ធ។ ស្វាមីមាននាទី​ឈរនៅកណ្ដាល​រវាងក្រុម​គ្រួសារទាំង​សងខាង។ ឪពុកម្ដាយ​បងប្អូន​របស់​លោកអ្នកក៏ ដូចជា​ឪពុកម្ដាយ​បងប្អូន​ខាង​ប្រពន្ធដែរ។ បើចង់​ទិញអ្វីជូន ត្រូវទិញជូន​ទាំងសងខាង បើជូនតែ​ខាងខ្លួនឯងប្រពន្ធ​លោកអ្នក​នឹងពិបាកចិត្ដ គិតថា​លោកមិន​ស្មោះត្រង់ ហើយមើល​ស្រាលខាង​ប្រពន្ធ។

ពាក្យថាគ្រួសារបើតាមវេចនានុក្រម របស់សម្តេចសង្ឃជួន ណាត​​ បានអោយដឹងថា​ ត្រកូល ប្រជុំត្រកូល មនុស្ស មានមាតា បិតា និងបុត្រធីតា។ ជីវិតគ្រួសារនេះហើយជាក្តីប្រាថ្នារបស់មនុស្សគ្រប់រូប ពោលគឺគេចង់បានគ្រួសារមួយប្រកបដោយភាពកក់ក្តៅ និងមានសុភមង្គល។ ជាទូទៅក្នុងគ្រួសារនីមួយៗតែងតែមានច្បាប់ទម្លាប់ផ្សេងៗគ្នា ដើម្បីរៀបចំនូវសុភមង្គលក្នុងគ្រួសារ ហើយខ្លះទៀតបានចែកផ្លូវគ្នាដោយសារតែខ្វះនូវវិធីសាស្ត្រគ្រប់គ្រង៕

Add new comment

9 + 3 =

Please wait while the page is loading